840.000 euro behar handiena duten ikastolentzako

Elkartasun Ikastolen Batzar Nagusiak 840.000 euroko laguntzak onartu zituen azaroaren 28an Orion egindako batzarrean. Diru hori Elkartasun Kutxari eskaera egin dioten hamar ikastolaren artean banatuko da 2020. urtean. Ibaizabal Ikastolak, familiek ordaintzen duten kuotatik zati bat Elkartasun Kutxara bideratuta, Ikastolen eredua euskararen eremu osoan kalitatez sustraitzen lagundu du. Behinola -sorrerako garaiaren bueltan- Ibaizabal Ikastolak laguntza jaso behar izan zuen moduan, orain premian dauden beste Ikastola batzuk babesteko ekarpen baliotsua egiten du, elkartasunez eta koherentziaz.

111 ikastolak; 4.500 irakaslek, 500 langile ez irakaslek, 57.000tik gora ikaslek eta parte-hartze zuzena duten haien familiek osatzen dugu Ikastolen Elkartea. Hezkuntza-proiektu sendo bat gara, Euskal Herri osoan hedatua dagoen hezkuntza-erakunde bakarra. Ikastola bakoitzak taldea indartzen du, eta taldeak ikastola bakoitza indartzen.

Bi europar kooperatibatan batzen gara. Ikastolen Elkartea eta Elkartasun Ikastolak. Ikastola guztiak gara bazkide bi horietan. Lehenak lankidetza irudikatzen badu, bigarrenak, izenean bertan dioen bezala, elkartasuna du ardatz.

Ikastola bakoitzak dituen ikasle-kopuruaren arabera urtero egindako ekarpenetik elikatzen da Elkartasun Kutxa, eta urtero banatzen da diru hori premia handiena duten ikastolen artean, ekarpen edo mailegu gisa. Azken urteotan, urtero, 800.000 euro inguru banatu dira.

Bere xede nagusia ikastolen bideragarritasuna bermatzea izanik, Elkartasun Kutxak helburu zehatz hauek ditu:

  • Ikastola berriak sortzen laguntzea.
  • Dagoeneko sortuta dauden ikastoletan, aktibitate estrategiko berriak abian jarri eta garatzen laguntzea.
  • Inbertsio estrategiko berriei aurre egiten laguntzea.
  • Tokian tokiko ikastola eta eremuetan, Ikastola Taldearentzat estrategikoak diren lerro berriak sortzen laguntzea. 

Taldearen laguntza behar duten ikastolentzat ikasturte-amaieran irekitzen da eskaera egiteko deialdia, eta hurrengoaren hasierara bitartean jasotzen dira eskariok. 

Batzorde Tekniko batek aztertzen ditu Elkartasun Kutxaren laguntza behar duten ikastolen eskariak. Talde hau Ikastolen Elkarteko eta ikastoletako adituek osatzen dute. Hauek txosten bat egiten dute, eta Balorazio Batzordera igortzen. Balorazio Batzordea Ikastolen Elkarteko Artezkaritza Kontseiluko eta zuzendaritzako kideez osatuta dago, eta txostena aztertu eta Artezkaritza Kontseilura eramaten dute behin-behineko proposamena. Artezkaritza Kontseiluak txostena aztertu eta oniritzia eman ostean, Elkartasun Ikastolen Batzar Nagusian bozkatzen dira urte horretako proposamenak.

Elkartasun Ikastolen Batzar Nagusiak 2020ko laguntzak ikastola hauei ematea ebatzi du (Batzarrean egon ziren Ibaizabal Ikastolako lehendakaria eta zuzendaria, gure Ikastola eta familia-bazkideak ordezkatzen. Guztira, Batzarrera deitutako 111 ikastoletatik, 88 agertu ginen, % 79,28a, alegia; inplikazio handiaren adierazgarri):

  • Lekorneko Baigura, Basusarriko Biez Bat, eta Angeluko Kimua ikastolei eta Kanboko Ikastolen Etxeari
  • Tuterako Argia eta Lodosako Ibaialde ikastolei
  • Bastidako Bastida eta Argantzungo Argantzon ikastolei
  • Eta Bilboko Abusu eta Harrobia ikastolei.

Elkartasun horri esker, aurrera aterako dituzte euren proiektuak, eta orain jaso dutena biderkatuta itzuliko dute ikastola hauek, beren proiektu eraldatzailearen bitartez heziko dituztelako ikasleak, euskaratik eta euskaraz. Ibaizabal Ikastolako familiek 4.000 € pasa jarrita lagundu dituzte behar berezian diren ikastola horiek guztiak.